ភ្នំពេញ ៖ បុរសម្នាក់ បានរងរបួសស្រាល ខណៈកំពុងធ្វើដំណើរត្រូវរថយន្តកុងតឺន័រ របស់ក្រុមហ៊ុន ផែស្ងួត «តេងឡាយ» បើកបុកម៉ូតូហុងដាឌ្រីមមួយគ្រឿង ដែលកំពុងឈប់ស្តុបកៀបជាប់ក្រោមកង់រថយន្តអូសជាច្រើនម៉ែត្រ កាលពីវេលាម៉ោង១១៖៣០នាទីយប់ ថ្ងៃព្រហស្បត្តិ៍ ទី២៦ ខែមករា ឆ្នាំ២០២៣ នៅតាមមហាវិថីចោមចៅ (ផ្លូវវេងស្រេង) ត្រង់ចំណុចស្តុបទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។
ជនរងគ្រោះជាម្ចាស់ម៉ូតូ បានប្រាប់ឱ្យដឹងថា មុនពេលកើតហេតុ រូបគាត់បានជិះម៉ូតូហុងដាឌ្រីម ស៊េរីឆ្នាំ២០១៨ ពណ៌ខ្មៅ ពាក់ផ្លាកលេខរដ្ឋ 13.1-9510 ធ្វើដំណើរតាមវិថីចោមចៅ ទិសដៅពីកើតទៅលិច ខណៈមកដល់ចំណុចកើតហេតុខាងលើ ក៏បានឈប់ស្តុបរងចាំភ្លើងខៀវដើម្បីបត់ឆ្វេងទៅផ្លូវទួលពង្រ ភ្លាមនោះស្រាប់តែមានរថយន្តកុងតឺន័រ របស់ក្រុមហ៊ុនផែស្ងួតតេងឡាយ ក្បាលពណ៌ខៀវ ពាក់ផ្លាកលេខ ភ្នំពេញ 3C-1374 បើកដោយបុរសម្នាក់ ទិសដៅស្របគ្នាមកពីក្រោយបុកម៉ូតូអូសជាប់ក្រោមរថយន្តជាច្រើនម៉ែត្រ រងការខូចខាត តែសំណាងល្អម្ចាស់ម៉ូតូរមៀលចេញពីរថយន្តរងរបួសស្រាល។
ក្រោយកើតហេតុ សមត្ថកិច្ចជំនាញផ្នែកចរាចរខណ្ឌពោធិ៍សែនជ័យ បានចុះមកវាស់វែង និងយករថយន្តបង្កទៅរក្សាទុកនៅអធិការនគរបាលខណ្ឌ រង់ចាំម្ចាស់ចូលខ្លួនមកដោះស្រាយ៕