មណ្ឌលគិរី ៖ ទឹកធ្លាក់ លែងអង លែងឃិន ស្ថិតក្នុងភូមិសាស្ត្រភូមិពូហ្សាម ឃុំសែនមនោរម្យ ស្រុកអូរាំង ខេត្តមណ្ឌលគិរី គឺជាកេរ្តិ៍ដំណែលធម្មជាតិ បានសំងំលាក់ខ្លួនក្នុងព្រៃភ្នំ អមជាមួយទេសភាពដ៏ស្រស់ត្រកាល កំពុងរង់ចាំភ្ញៀវទេសចរជាតិ និងអន្តរជាតិមកទស្សនា។ នេះបើយោងតាមប្រភពពីក្រសួងបរិស្ថាន បានបង្ហាញនៅថ្ងៃពុធ ទី២៥ ខែមករា ឆ្នាំ២០២៣នេះ។
សូមជម្រាបថា ទឹកធ្លាក់ធម្មជាតិនេះ មានចម្ងាយប្រមាណ ៤គីឡូម៉ែត្រ ពីផ្លូជាតិលេខ៧៦ ដោយធ្វើដំណើរតាមច្រកចូលផ្លូវលំក្រហម នៅផ្នែកខាងឆ្វេងដៃ។ ពេលធ្វើដំណើរពីភ្នំពេញហួសច្រកផ្លូវស្រុកអូរាំង ប្រមាណ១០០ម៉ែត្រ ដែលហ៊ុមព័ទ្ធដោយព្រៃព្រឹក្សាត្រជាក់ល្ហឹម ជាទីឋានលម្ហែកាយ និងងួតទឹកកម្សាន្តដ៏ស្ងប់ស្ងាត់ ស្ថិតនៅក្នុងភូមិពូហ្សាម ឃុំសែនមនោរម្យ ស្រុកអូរាំង និងមានចម្ងាយពីទីក្រុងសែនមនោរម្យ ២៦គីឡូម៉ែត្រ៕