របបអាហារដែលល្អបំផុត សម្រាប់វ័យពី ៥០ និង ៦០ឆ្នាំឡើង

សុខភាព ៖ ឈានចូលដល់វ័យ ៥០-៦០ឆ្នាំ គឺជាវ័យមួយដែលមានការផ្លាស់ប្ដូររាងកាយខ្ពស់បំផុត និងក៏ជាពេលដែលយើងគួរគិតគូរពីរបរអាហារទទួលទានប្រចាំថ្ងៃផងដែរ ដើម្បីឱ្យរាងកាយកាន់តែប្រសើរឡើង។ តាមរយៈការ សិក្សា ការរក្សាលំនាំនៃការញ៉ាំប្រកបដោយតុល្យភាពដែលសង្កត់ធ្ងន់លើសារធាតុចិញ្ចឹមសំខាន់ៗ គឺជាឱកាសដែលអ្នកអាចកែលម្អភាពចាស់ ដើម្បីបន្តការរស់នៅប្រកបដោយភាពស្វាហាប់ និងសកម្ម។ អត្ថបទនេះនឹងផ្តល់នូវមគ្គុទ្ទេសក៍ដ៏ចំណាន ដើម្បីបង្ហាញពីការញ៉ាំអាហារដែលមានសុខភាពល្អក្នុងវ័យ ៥០ និង ៦០ ឆ្នាំដល់អ្នក។

* អាហាររូបត្ថម្ភ និងអាហារដែលត្រូវយកចិត្តទុកដាក់

ក្នុងអំឡុងពេលអាយុ ៥០ និង ៦០ឆ្នាំ វាជារឿងសំខាន់ដែលអ្នកទទួលបានសារធាតុចិញ្ចឹមសំខាន់ៗជាច្រើនជារៀងរាល់ថ្ងៃ។ ក្នុងនោះរួមមាន៖

*ប្រូតេអ៊ីន៖ ការទទួលទានប្រូតេអ៊ីនគ្រប់គ្រាន់ជួយបង្កើត និងរក្សាម៉ាសសាច់ដុំគ្មានខ្លាញ់ ដែលមានសារសំខាន់សម្រាប់របៀបរស់នៅសកម្ម ការរំលាយអាហារ និងសុខភាពប្រព័ន្ធភាពស៊ាំ ។ អាហារដែលមានប្រូតេអ៊ីនខ្ពស់រួមមាន៖ សាច់គ្មានខ្លាញ់ បសុបក្សី ត្រី តៅហ៊ូ ស៊ុត សណ្តែក គ្រាប់ធញ្ញជាតិ និង ផលិតផល ទឹកដោះគោ។ល។

* ជាតិសរសៃ៖ ការទទួលទានជាតិសរសៃជួយជំរុញចលនាពោះវៀនដែលមានសុខភាពល្អ និងការរំលាយអាហារ គាំទ្រសុខភាពបេះដូង បន្ថយការស្រូបយកជាតិស្ករ ដើម្បីធ្វើឱ្យកម្រិតជាតិស្ករក្នុងឈាមមានស្ថិរភាព និងជួយរក្សាទម្ងន់ឱ្យមានសុខភាពល្អ ។ អាហារដែលមានជាតិសរសៃខ្ពស់រួមមាន៖ បន្លែ ផ្លែឈើ ធញ្ញជាតិ អង្ករសំរូប សណ្តែក។ល។

* កាល់ស្យូម៖ កាល់ស្យូមគឺជាសារធាតុរ៉ែដ៏សំខាន់សម្រាប់សុខភាពឆ្អឹង មុខងារសរសៃប្រសាទ និងការកន្ត្រាក់បេះដូង និងសាច់ដុំ។ ការទទួលទានជាតិកាល់ស្យូមគ្រប់គ្រាន់អាចជួយការពារជំងឺដែលទាក់ទងនឹងឆ្អឹងដូចជា ជំងឺពុកឆ្អឹង ។ល។ អាហារដែលមានជាតិកាល់ស្យូមខ្ពស់ រួមមាន៖ ផលិតផលទឹកដោះគោ ឈីស ស្លឹកបៃតង សណ្តែកសៀង។ល។

* វីតាមីន D៖ វីតាមីន D មានសារសំខាន់សម្រាប់សុខភាពឆ្អឹង និងភាពស៊ាំ។ វាក៏ត្រូវបានផ្សារភ្ជាប់ជាមួយនឹងការថយចុះផ្លូវចិត្ត ភាពទន់ខ្សោយ សុខភាពបេះដូងខ្សោយ ជំងឺធ្លាក់ទឹកចិត្ត ជំងឺពុកឆ្អឹង ជំងឺទឹកនោមផ្អែមប្រភេទទី ២ និងប្រភេទមហារីកមួយចំនួន ។ វីតាមីន D ត្រូវ បាន គេ ស្គាល់ ផង ដែរ ថា ជា “វីតាមីន ពន្លឺ ព្រះ អាទិត្យ” ព្រោះ រាងកាយ របស់ យើង អាច ផលិត វា បាន ពី ការ ប៉ះ នឹង ពន្លឺ ថ្ងៃ។ ប៉ុន្តែ ការត្រូវកម្តៅថ្ងៃច្រើនពេកអាចមានគ្រោះថ្នាក់ ដូច្នេះគួរព្យាយាមទទួលបានវីតាមីននេះពីអាហារបំប៉ន ឬអាហារដូចជាផលិតផលទឹកដោះគោ ផ្សិត ស៊ុតលឿង និងត្រីខ្លាញ់។

* អាស៊ីតខ្លាញ់អូមេហ្គា៣៖ របបអាហារសម្បូរអាស៊ីតខ្លាញ់អូមេហ្គា៣ ត្រូវបានផ្សារភ្ជាប់ជាមួយនឹងអត្រាទាបនៃការថយចុះផ្លូវចិត្ត និងជំងឺសរសៃប្រសាទ-ដូចជាជំងឺភ្លេចភ្លាំង និងជំងឺវង្វេង-ក៏ដូចជាសុខភាពខួរក្បាល បេះដូង និងស្បែកកាន់តែប្រសើរឡើង។ ប្រភពអាហារនៃខ្លាញ់អូមេហ្គា៣ រួមមាន៖ ត្រីខ្លាញ់ (រួមទាំងត្រីសាម៉ុង ត្រីសាឌីន និងត្រីធូណា) គ្រាប់ធញ្ញជាតិ និង ប្រេង ។ល។

* វីតាមីន B១២៖ វីតាមីននេះដើរតួយ៉ាងសំខាន់ក្នុងការរំលាយអាហារថាមពល ការផលិតកោសិកាឈាមក្រហម ការជួសជុល DNA មុខងារប្រព័ន្ធភាពស៊ាំ សុខភាពខួរក្បាល និងបេះដូង។ បន្ទាប់ពីអាយុ ៥០ ឆ្នាំ សមត្ថភាពរាងកាយរបស់អ្នកក្នុងការស្រូបយកវីតាមីន B១២ ថយចុះ ដូច្នេះវាកាន់តែមានសារសំខាន់ក្នុងការទទួលបានវីតាមីននេះនៅក្នុងរបបអាហាររបស់អ្នក ។ វីតាមីន B១២ ត្រូវបានរកឃើញភាគច្រើននៅក្នុងអាហារដូចជា សាច់ បសុបក្សី ត្រី ស៊ុត និងផលិតផលទឹកដោះគោ ។ល។។

* ប៉ូតាស្យូម៖ ប៉ូតាស្យូម គឺជាសារធាតុរ៉ែ និងអេឡិចត្រូលីតដែលអ្នកត្រូវការ តាមរយៈរបបអាហាររបស់អ្នក។ ការទទួលទានប៉ូតាស្យូមគ្រប់គ្រាន់ត្រូវបានផ្សារភ្ជាប់ជាមួយនឹងការថយចុះហានិភ័យនៃជំងឺលើសឈាម ជំងឺដាច់សរសៃឈាមខួរក្បាល និងជំងឺបេះដូង។ លើសពីនេះ វាជួយទ្រទ្រង់ឆ្អឹងដែលមានសុខភាពល្អ ។សារធាតុរ៉ែនេះមាននៅក្នុងប្រភពអាហារជាច្រើនដូចជា៖ បន្លែ និងផ្លែឈើដូចជា ចេក ទុរេន ត្របែក ផ្លែប៉ែស ក្រូច ដំឡូង ស្ពៃក្តោប និងស្លឹកបៃតង។ល។

* សារធាតុប្រឆាំងអុកស៊ីតកម្ម៖ សារធាតុប្រឆាំងអុកស៊ីតកម្មជួយបន្សាបសមាសធាតុរ៉ាឌីកាល់សេរី ដែលអាចនាំឱ្យមានភាពតានតឹងអុកស៊ីតកម្ម ដែលជាកត្តារួមចំណែកដ៏សំខាន់ដល់ភាពចាស់ និងជំងឺរ៉ាំរ៉ៃ។ សារធាតុប្រឆាំងអុកស៊ីតកម្មរួមមានវីតាមីន A, C, និង E និងសារធាតុរ៉ែដូចជាស័ង្កសី ទង់ដែង និងសេលេញ៉ូម ។ ប្រភពអាហារដ៏ល្អបំផុតនៃសារធាតុប្រឆាំងអុកស៊ីតកម្មរួមមាន៖ ផ្លែឈើ និងបន្លែចម្រុះពណ៌ គ្រាប់ធញ្ញជាតិ សូកូឡា ខ្មៅ កាហ្វេ និងតែ។ល៕

ប្រភព៖ healthline

Leave a Reply

Your email address will not be published. Required fields are marked *